రెండవ వ్యాసం

                                     మనిషిగా పుట్టినందుకు, సమాజంలో ఒకడిగా ఆ సమాజపు నియమాలకు లోబడై జీవించడం అనేది తప్పనసరి అయిన విషయం. కొన్ని నియమాలు తప్పనిసరిగా పాటించాల్సినవి కాబట్టి పాటిస్తాం, మరికొన్ని మనకు తెలియకుండానే అందరూ పాటిస్తున్నారని అనుసరించేస్తాం. ప్రతి ఒక్కరికి జీవితంలో చాలా సందర్భాల్లో కుటుంబం చేయలేని సాయం అవసరం అవుతుంది. ఆ సాయం సమాజం నుండి నువ్వు పొందాలంటే మనం కూడా సమాజంలో భాగమే అని ఆ సమాజంలో ఉన్నవారందరికీ ఎప్పుడూ, లేదా కనీసం అప్పుడప్పుడు అయినా గుర్తు చేస్తూ ఉండాలి.

                                       తమకి నచ్చకపోయినా సమాజానికి నచ్చినట్లుగా జీవించలేక నటిస్తూ నలిగిపోయేవారు ఎంతోమంది. కనీసం సమాజంతో అవసరం లేకుండా, తనకు నచ్చినట్లు బ్రతికే స్థాయికి సమయం పడుతుంది. ఆ సమయంలో అయినా నటించక తప్పదు. అందరూ ఆ బంధనాల నుండి తప్పించుకోవాలని జీవితంలో పోరాడేవారే. అయితే కొంతమందికి కుటుంబరీత్యానో, పరిస్థితుల దృష్ట్యానో కష్టపడడం అలవాటు అయి తొందరగా సమాజాన్ని శాసించే స్థాయికి ఎదుగుతారు. కొంతమందికి ఆ స్థాయికి ఎదగాలని ఉన్నా, పరిస్థితుల ప్రభావం వలనో సరైన ప్రయత్నం లేకపోవడం వలనో అనుకున్న స్థాయికి వెళ్ళలేక ఉన్న స్థాయి లో బ్రతకలేక నలిగిపోతూ పైకి నవ్వు నటించే వారే ఎక్కువ మంది. సమాజం అంటే కొందరికి నచ్చినట్లు అందరు బ్రతకడెమెమో అని అప్పుడప్పుడూ అనిపిస్తూ ఉంటుంది.

                                                                    మనకి తెలియకుండానే మనం రోజూ చేసే పనులు, మనం తీసుకునే ఎన్నో కీలకమైన ఎన్నో నిర్ణయాలు ఆ సమాజం ప్రభావితం చేసినవే అయ్యి ఉంటాయి. దీనికి సరైన ఉదాహారణ ఎన్నికలు. కొంతమంది తమకు ఇష్టం లేకపోయినా తమ కుటుంబ సభ్యులు ఎప్పటి నుంచో వేస్తున్నారని ఒకే పార్టీకి ఓట్లు వేస్తారు. కొంతమంది అయితే వ్యక్తి గురించి అసలు పట్టించుకోరు, ఎక్కువ మంది అనుకుంటున్నారని ఒక వ్యక్తికి ఓట్లేస్తారు. వీరిలో ఎవ్వరిని మీది తప్పు అని నిందించకూడదు. వంశ పారంపర్యంగా ఓట్లేసే వారిని మీరు చేసేది తప్పు అంటే అది వారిని మాత్రమే కాదు ఎంతో కాలం నుండి ఓట్లేస్తున్న వారి కుటుంబ సభ్యులని కూడా నిందించినట్లు. అందుకే చాలా మంది గుడ్డిగా ఒక వ్యక్తి గురించి సరైన అవగాహన లేకపోయినా ఆ వ్యక్తికి వోటేసేసి వారి నిర్ణయాన్ని గట్టిగా నమ్మేసి తప్పు అన్న వారిపై తిరగబడతారు. తాము తీసుకున్నది సరైన నిర్ణయమే అని నిందించిన వారు ఒప్పుకునేనంత వరకూ అన్ని విధాలా వాదిస్తూనే ఉంటారు.

                            ఇలాంటి వారితో వాదించడం వ్యర్థం అని నా అభిప్రాయం. వారికి వారుగా తెలుసుకొని మారితే తప్ప మనం వారి ఆలోచనా విధానాన్ని మార్చలేము. మరికొంతమంది మాత్రం ఎక్కువమంది ఎవరికి ఓట్లేద్దాం అని అనుకుంటున్నారో వారికే ఓట్లేస్తారు. ఈ ఆలోచనా విధానాన్ని రాజకీయనాయకులు తమకి అనుకూలంగా మార్చుకొని ప్రజలని ప్రభావితం చేసేలా మాట్లాడి, మాయ చేసి అధికారం చేజిక్కించుకుంటున్నారు. వీరందరి ఆలోచనా విధానాన్ని మార్చడం అనేది అంత సులభమైన విషయం కాదు. ఎందుకంటే ఎంతైనా మనుషులం కదా, మనకి గర్వం ఎక్కువ. ఎవడో చెప్తే విని చేస్తే చెప్పినోడు గొప్ప అని ఒప్పుకున్నట్లు భావించే వారు ఎక్కువమంది. చాల వారకు మనలో ఎవరూ వేరొకరు గొప్ప అని ఒప్పుకోవడానికి ఇష్టపడరు. మళ్ళీ రాజకీయ నాయకులు చెప్పిన మాటలు విని ఓట్లేసి గెలిపించినప్పుడు ఈ అహం అడ్డు రాదు అనుకుంట. ఎందుకంటే ఒక మనిషి గొప్పోడు అని అందరూ ఒప్పుకుంటేనే వాడు గొప్పోడు. మనతో పాటు తిరిగి మనకి మంచి చెప్పినోడు మనకంటే గొప్పోడు అని ఒప్పుకోవాల్సి వస్తుందని భావంతో చెప్పిన మంచిని కూడా పెడచెవిన పెడుతున్నారు.

వీరి భావజాలాన్ని మార్చి ఎవరికి వారే గొప్పవారు అనే భావన్ కలిగించాలనే ఆలోచన అధికారంలో ఉన్న అవినీతి రాజకీయ నాయకులకి ఉండదు. ఎందుకంటే వాళ్ళ భావజాలం మారితే తమకే అధికారం ఉండదు అనే విషయం వారికి తెలుసు. అందుకే ఎప్పటికి వారిని అలా తాయిలాలు ఇచ్చి బానిసలుగా బ్రతకనిస్తారే తప్పు, వారి బ్రతుకులు బాగు చేసుకునే విధంగా ఎదగడానికి ఎటువంటి చర్యలు తీసుకోరు. ఇది ఎన్నో ఏళ్ళ నుండి మనలో పాతుకుపోయి, మనతో కలిసి జీవనం సాగిస్తూ, మనతో పోటిపడి ఎదుగుతున్న ఒక చీడపురుగు. ఈ చీడపురుగుని ఒకే రోజులో తొలగించలేము. ఒకొక్కరిగా అందరూ ప్రజాస్వామ్యంలో ప్రతి ఒకారు సమానమే, ఏ ఒకారు గొప్పవారు కాదు అనే భావం కలిగిన నాడే మార్పు సాధ్యం. అంతవరకూ సమాజాన్ని అడ్డుగా పెట్టుకొని మనల్ని ప్రభావితం చేసి పబ్బం గడుపుకోవాలనుకునే రాజకీయ నాయకుల కుట్రలని గమనిస్తూ వారి వలలో పడకుండా జాగ్రత్త పడుతూ ముందుకు సాగుతూ ఆశించిన మార్పుకై ఎదురుచూడడం ఒక్కటే మనం చేయగలిగింది.

Note: పైవన్నీ కేవలం నా అభిప్రాయాలు మాత్రమే..!!